Na, i bin net da Ansicht, da Kiesmeier oder wia der hoaßt, hod recht, wenn er an Varein vor an Kadi ziaght. I kenn den Kiesreiher no net amoi. Jedenfois bin I gwiss koana net, der wo an eigenen Verein vor an Kadi ziaght. Fia nixn. Net wega a rechtsverdreharischem Spatznhirngschiss, aber aa net fia a boa Markl Mitgliadsbeitrag mehra oder weniga. Was ja letzt Jahr im Gspräch gwen is, und do herinna wohl a greeßerne Mehrheit gfunden hätt. Und i will an Kiesreiher aa net verteidigen. Aber was der Kiesreiher wui, oder was net is Scheißwuaschd. As Problem an dera Gschicht kimmt vo ganz woanders her. Weil as eben net bloß a vereinsinterne Vereinsmeierei is.
Letzts Jahr auf da außerordentlichen DV hod da Voihepp doch umamand tönt, dass de Markenrechte am Varein vo da KGamArsch „ ab sofort“ wieder zruck auf an Varein übertragen wurdn.
Aber wia lafft denn so a Rückübertragung im echten Lem? Richtig durch an Vertrog. De KGaA hod am Varein as Angebot gmacht, dass den Namensrecht wieder zruck übertragen werdn. Und dann hod da Monatseder, drunt wo sei Nama steht, sein Pumuckl unter des Angebot gschriabn, und as Angebot damit oognumma. Bled nur, dass, wia se etza rausgstellt hod, da Voihepp garnet berechtigt gwen is, im Nama vom Varein sein Pumuckl unter an Vertrag zum setzen. De Rechtsverdreha nenna sowas glaab i, Vertreter ohne Tretungsmacht oder so.
Und was hoaßt des etza fia den Vertrag. Der is bis der Varein des wirksam genehmigt in der Schweben. Genauso, wia wenn da minderjährige Bua vom Schorschi losgeht und se an FCBäh Schaal kafft. Dann kunn da Schorschi, als Erziehungsverbrechtigter hergehn, dem Verkäufer sein Fanschal in de Fotzn knallen und sogn, i genehmig des Gschaftl net, und er soi sein roten Scheißdreck, wo se offensichtlich a kompletter Stammtisch an Oasch mit abgwischt hod, gfälligst wieder zruck nemma und as Diridari wieder aussa rucken. Und der muas des macha, weil des Gschaftl mit am Schorschi seim minderjährigen Buam mangels Erteilung vo da Genehmigung unwirksam gwen is.
Und de Rückübertragung vo de Rechte is genauso in da Schwebe. Weil genehmigt hod des bis etza koana net (kenna), und da Voihepp is ja net dazua berechtigt gwen. De Gaudi an der Gschicht is etza, dass da andere Vertragspartner so a Gschaftl in da Schwebe etza bis zur Genehmigung jederzeit widerrufen ko. Oiso ko etza de KGaA hergehn und sogn, nix is mit Rückübertragung, her mit de Rechte. Und dabei muas ma bedenka, das in da Gesellschaftervasammlung vo da KGaA am Imaik sei Leit hocka und Vereinsvertreter wo ma offensichtlich streiten ko, ob de berechtigt san, an Varein in dera Versammlung zum vertreten. Und de Gsellschafterversammlung is (mit stimmberechtigta Mehrheit) berechtigt am Gschaftlfiahra vo da Gesellschaft Weisungen zum erteilen. Zwar hod Gschaftlfiahra-GmbH als Komplementärin as Recht zur Gschaftlfiahrung. Dummerweis is dort in dem komischen Beirat aber aa der Vertreter vom Eigentümer vo da Gschaftlfiahra-GmbH (= da Varein) vo jemand vertreten worden, der se Voihepp schimpft und gar koa Vertretungsmacht net ghabd hod.
Und da muas ma aa scho no amoi erwähnen, das wega genau dera Gschicht, da Rückübertragung vo de Markenrechte, da Imaik letzt’s Jahr sogar Strafanzeige gega an Schäferbua wega Untreue gstellt hod. Da is zwar letztlich nix aussa kemma, aber recht is des am Imaik und seim Rechtsverdreha de Gschicht net gwen.
Und dann is aa no de Infront-Gschicht aa genau in de Zeit gfoin. Wo as doch de singing Fee geben hod, wia des bei de Schlispgangsta hoaßt. Und bei dene Verhandlunga is ja angeblich aa da Voihepp beteiligt gwen. Hod er auf da Pressekonferenz z’menigs selbst gsogd. Als Gesellschaftervertreter vom Varein in da KGaA, fia den er nia net hätt verhandeln derfa. Und des ganze dazumois ja aa gega den Willen vo am Imaik, am anderen KGaA-Gesellschafter. Mit am unterschied, das da Imaik mehra Vertretungsrechte hod, wia da Voihepp jemois ghabd hod. So wia i des vo am Rechtsverdreha vazäit kriagt hob, ko dann wenn’s bled laaft, de Infront den Deal aa no oofechten, weil se über de Vertretungsfahigkeit vom Voihepp arglistig deischt wurd. Hoaßt, wenn infront mog, kenna se den Vertag oofechten und eana singende Fee zruckverlanga. Am End vielleicht sogar no VW und de andern Sponsoren? Des konnt ma selbst da Rechtsverdreha net beantworten.
I dad sogn, dann kannt as recht eng werden. Aber gwiss finden dann de ganzen haumdauchaden Vorturner bei uns wieder irgend an Profissor, dem’s a Diridari rüberschiabn kenna, damit er a Gutachten schreibt, des wo besagt des is ois richtig glaffa. I moan, da letzte Profissor war aus Franken, kenna’s ja diesmoi bei de Schwobn schaugn, fia gnua Diridari macha die ja bekanntlich ois.
Und do macht‘s ihr eich Gedanken drüber, was bloß dieser Kiesmeier überhaupts wui? – Der Kiesreiher is gwiss unser geringstes Problem. I persönlich hoff bloß, das ois was da Voihepp behauptet duan zum haben, in Wahrheit net sei Unterschrift tragt. Ansonsten ko de Gschicht no vui finsterner nausgehn, wia dazumois beim Riedl. Weil dann is wuaschd, was da Kiesreiher wui. Dann is entscheidend, was Infront, de Sponsoren und da Imaik woin. Und des is im Zweifel wohl eher möglichst vui Diridari, wia as beste fia Sechzge. Aber macht ja nixn, san ma mia ja net scho gnua abhängig vo anderne Oaschlecher.
Bloß da Insolwenz soitat bei da KGamArsch liaba net aussgspuit werden, weil dann da Insolwenzverwoiter den oana oder andern Vertrag daschiaßen kannt, weil der wega fehlender Vertretungsmacht net so ganz korrekt gwen is. Der dadad dann am End alle Verträg zwischa KGaA und am Varein aus am letzten Jahr daschiaßn, was letzlich wieder as Finanzamt auf an Plan ruaft, wega dem dann daschossenen Gschaftlbsorgavertrag. Glaabt’s ihr ma net? Dann habds ihr aber no nia net im Leben mit am Insolwenzverwoiter zum duan ghabd. Glaabt’s ma liaba. So oana is wia da Marder, der hebt ois aussa!
Aber des is ja ois bloß wieder a Riesenschmarrn, was i da vazäi. Weil, wenn da Kiesreiher sei Klage endlich zruckziaght – zum Wohle vo am Varein – und se Infront, da Imaik und etwaige Sponsoren ruhig verhoitn, bis bei uns endlich amoi wer dazua kimmt, de Gschaftl vo am Voihepp zum Genehmigen, nachdem nachad klärt is, wer dazua befugt is, dann werd gwiss ois wieda guad. Fest versprocha! Weil dann schaugt den Scheißdreck den da Aufsichtsrat und da Vorstand letzt’s Jahr baut hod, neamand mehr genau oo… Freili, ois zum Wohle vo unserm Varein.